Ես կորցրել եմ: Ես բաց եմ թողել: Ես ձևացրել եմ, թե անտարբեր եմ: Ես սեր չեմ տվել: Ես հպարտ եմ խաղացել: Ես ետ եմ կանգնել: Ես հրաժարվել եմ: Ես ձևացրել եմ, թե քար եմ: Ու ես կորցրել եմ... Ես կյանքիս մեծագույն սերն եմ կորցրել: Ու թքած, որ նա իմ բախտը չէր, ես նրան կյանքիցս առավել եմ սիրել, ես այդ սիրուց գժվել եմ, ես հոգիս եմ ողջակիզել ու մի մեծ սեր եմ թաղել... Ես իմ սերը սպանել ու երկար ժամանակ մեռած եմ եղել...
Ես չեմ պայքարել, ես լռել ու կորցրել եմ նրան այնպես, ինչպես դու ես հիմա ինձ կորցնում...
Ես այն ձմեռն եմ կորցրել, այն դեկտեմբերը, ես ինքս ինձ եմ կորցրել: Ես սիրել եմ, ես նրան ինձնից էլ շատ եմ սիրել, ես իմ սիրտն եմ նրան տվել, ես նրա աչքերն եմ պաշտել... Ես բաց եմ թողել, ես հիմարաբար կորցրել եմ... Ես իմ սիրո հետ այնպես եմ վարվել, կարծես նա տարիներով պիտի իմ նազը քաշեր, սպասեր ինձ... Ու ես ինձ չեմ ներել... Դու երբեք էլ չես հասկանա, թե ինչ մեծ ցավ կա իմ ներսում... Նա սպանել է ինձ, իսկ դու կյանք չես տվել...
Ես քո պատճենն եմ եղել, ես քեզնից էլ հպարտ ու սառն եմ եղել...
Համբերությանս բաժակը լցվել է, հոգիս նորից ծածկվել է ծակող փշերով, սերս բախվել է քո կառուցած ժայռին, գլորվել ու անդունդն է գահավիժել: Իմ սերը, որն այնքան ուզում էի, որ ապառնի դառնար, այլևս անցյալ անկատար պիտի կոչեմ:
Ես այս ամենը տանելու ուժ չունեմ, ես այս սերն իմ մեջ կրել այլևս չեմ կարող: Թող Աստված ների մեզ...
Անհաջող էր վերջին անգամ սիրել ցանկանալու մոլուցքս. դու ինձ չես սիրում: Որքան էլ փորձեմ արդարացնել արածներդ ու չարածներդ, ներսումս միայն ցավ կա, մի մեծ տխրություն ու փշուր-փշուր եղած հույսեր...
Ես երեխա չեմ, ես փոփոխամիտ ու փոփոխական չեմ, ես միշտ միայն մի բան եմ ցանկացել, ես անչափ ուզեցել եմ, որ մենք երջանիկ լինենք... Միասին չի ստացվի, շարունակ ապացուցում ես...
Դու կորցնում ես ինձ, ամեն վայրկյան, ամեն ժամ ու ամեն օր ավելի շատ... Քո այս ուղին դեպի ինձ չի բերում, քո այս ուղին իմ սերն է սպանում...
Սխալ էր, արածս ամեն քայլը սխալ էր: Իմ ներսում կյանք չես թողել, դու ողջ-ողջ թաղել ես սերս, դու ինձ չես սիրել... Փակվիր քո մեջ, դատիր ինձ, մեղադրիր... Քեզ սիրելու ուժ ես այլևս չունեմ... Թող Աստված ների քեզ...
Դու կորցրել ես: Դու բաց ես թողել: Դու ձևացրել ես, թե անտարբեր ես: Դու սեր չես տվել:
Դու կորցրել ես: Դու բաց ես թողել: Դու ձևացրել ես, թե անտարբեր ես: Դու սեր չես տվել:
No comments:
Post a Comment