Ընկերներ ենք

Մենք ուղղակի ընկերներ ենք` սրտակից ու բազում նմանություններով, և ուրիշ ոչինչ:

Երբեք մտքովս անգամ չէր անցնի, որ կարող եմ տղա ընկեր ունենալ: Դե նրանք կամ սիրահարվում էին ինձ ու փորձում ժամադրել, կամ էլ վիճում էինք ու դադարում ընկերներ լինելուց:

Ես քեզ այնքան լավ եմ ճանաչում, ու, կարծում եմ, հենց այդ պատճառով էլ չսիրահարվեցի քեզ: Ես այդպիսին եմ, բոլորովին անծանոթներին եմ սիրահարվում:

Մենք նույն ոճի երաժշտություն ենք լսում, միևնույն ֆիլմերն ենք դիտում, մեր նախասիրությունները գրեթե համընկնում են: Ես գնահատում եմ չափից դուրս անկեղծությունդ` դու չես ամաչում ինձ պատմել, թե ինչպես է քեզ հուզել որևէ ֆիլմ, չես թաքցնում, որ կարող ես արտասվել փոքրիկ երեխայի պես, կամ թե ինչ ես մտածում առհասարակ:

Դու պատրաստ ես օգնել ինձ ցանկացած հարցում, անգամ եթե գիշերվա ժամը 5-ը լինի, կամ եթե երթուղայինի մեջ լինես, կամ էլ թե քննության ժամանակ: Դու մինչև հոգուդ խորքը նվիրվում ես, իսկ սիրտդ շատ խորն է, չափազանց խորը:

Միշտ նկատում ես տխրությունս, խորհուրդներ տալիս, հուսադրում: Հաճախ քեզ տղաների նկարներ եմ ցույց տալիս, բայց դու երբեք նրանցից և ոչ մեկին չես հավանում` մեկն ինձ արժանի չէ, մյուսը մեծամիտ է, մեկ ուրիշը չափազանց մեծ ինձնից: Դու ծաղրանուններ ես հորինում նրանց համար ու փորձում բաց անել աչքերս:

Աշխարհն ավելի լավը կլիներ, եթե քեզ նման մարդիկ շատ լինեին, հավատա: Ազնիվ, աշխատասեր, կամեցող, ռոմանտիկ, պարզ ու հասարակ, հումորով ու մի փոքր խենթ:

Միշտ հաճույքով կարդում եմ քո գրած շարադրությունները` համեմված քո ուժեղ ու համառ բնավորությամբ: Սիրում եմ զրուցել քեզ հետ ու որևէ բան քննարկել:

Իմ լավ ընկեր, ուզում եմ միշտ կողքիս լինես: Ես շատ ընկերներից եմ հրաժարվել, բայց քեզ չեմ կարող կորցնել:

Ուզում եմ, որ գտնես երջանկությունդ, որովհետև դու արժանի ես ամենամեծ ու անդավաճան սիրուն: Ուզում եմ, որ քեզ վսեմացնող որակներդ միայն ավելի ծաղկեն ու զորանան: Ուզում եմ, որ անհաս բարձունքներ նվաճես, բայց միշտ մնաս հենց այսպիսին...