ԽՈՍՔ ԱՌ ԱՍՏՎԱԾ

«Սերը համբերող է, քաղցրաբարո է. սերը չի նախանձում, չի ամբարտավանում, չի գոռոզանում, անվայել վարմունք չի ունենում, իրենը չի փնտրում, բարկությամբ չի գրգռվում, չար բան չի խորհում, անիրավության վրա չի ուրախանում, այլ ուրախանում է ճշմարտության վրա. ամեն բանի դիմանում է, ամեն բանի հավատում է, մշտապես հույս է տածում, ամեն բանի համբերում»: - Ա Կորնթ. 13:4-7

Տեր երկնքի և երկրի` ամենակալ, ամենազոր, որ հրաշքներ ես գործում ու փրկություն բերում, թողություն շնորհում մեղքերին ու մաքրում անիրավությունից, առաջնորդում արդարության ճանապարհով և ճշմարտության խորհուրդներով ուղի մատնանշում: Սուրբ է Անունը Քո:
Օրհնյալ է Աստված և Հայրը մեր Տեր և Փրկիչ Հիսուս Քրիստոսի: Գոհություն ենք հայտնում Քեզ մեր ներսում վառած մշտավառ լույսի, Քո կենարար խոսքի և պարգևած ամեն շնորհի համար: Քո հրաշագործ զորությամբ բարեհաճ ես բոլորի հանդեպ: Փառք Քեզ, Տեր, որ փարատում ես տառապյալներին և սրտապնդում հուսալքվածներին: Քո իմաստությամբ քննում ես մարդկանց սրտերի խորհուրդներն ու մտածումները, լսում ես արդարի օգնության աղերսն ու ազատում նեղություններից` հատուցելով յուրաքանչյուրին ըստ իր գործերի:
Ողորմած և բարեգութ Աստված, շնորհակալ ենք Քո սիրո, հոգատարության և բարության համար: Սերը քեզնից է, Դու բնակվում ես մեր մեջ, և Քո սերը կատարյալ է: Գոհությամբ փառաբանում ենք Անունդ մարդկային վշտերի ծովից, չարից և անօրենից մեզ հեռու պահելու, կեղծությունից և ստությունից մեզ փրկելու և նեղության մեջ զորացնելու համար: Խոնարհվում ենք Քո առջև լավն ու բարին մեզ ընդառաջ բերելու, սխալներից հեռու պահելու, մեր գործած սխալները շտկելու համար: Գոհություն Քեզ, երկնային արքայության Տեր, քանզի տվել ես կամք, օգնել ես լինել բարի, ազնիվ, շիտակ ու արդար, սովորեցրել ես, որ ամեն բան իր ժամանակն ունի և սովորեցրել ես ապրել այսօրվա օրով: Պատվում ենք Քեզ, քանզի օգնում ես ամուր հիմքերի վրա հաստատել ու պահպանել մեր հավատը, միշտ ուրախ լինել, չարի փոխարեն չարը չհատուցել և չարին բարով հաղթել: Երկնավոր Հայր, Քո Սուրբ Հոգին մեզ հետ է: Մեր հովանավոր ու առաջնորդ, պահապան ու պաշտպան, Քո պատվիրանները պահել ենք մեր սրտի մեջ և հոգու խորքում: Աղոթքը մեր շուրթերին խորին նվիրումով փառաբանում ենք Քեզ, քանզի պարգևել ես կյանք, սեր և խաղաղություն:
Ամենազոր Տեր, հիշո՞ւմ ես` արցունքն աչքերիս մեղադրում էի Քեզ, թե ինձ մենակ ես թողել: Հիշո՞ւմ ես` տխրում էի, բողոքում, նեղանում Քեզնից: Շնորհակալ եմ, որ կողքիս էիր այն ժամանակ, երբ ինքս էի ինձ մենակ թողել: Շնորհակալ եմ, որ չլքեցիր ինձ և ներեցիր բոլոր մեղքերս: Շնորհակալ եմ, որ շարունակեցիր սիրել ու հասկանալ ինձ: Շնորհակալ եմ, քանզի Սուրբ Հոգու զորությամբ ինձ հույսով ողողեցիր և անհատակ հավատի շողերով նոր շունչ տվեցիր: Շնորհակալ եմ ինձ պարգևած ճշմարտության, անսպառ լույսի և խոր հանգստության համար: Շնորհակալ եմ մտքերս նորոգելու, ինձ ամոքելու և խաղաղությամբ օրհնելու, մութ ու խավարի միջով դեպի ճշմարտություն ձեռքս ամուր բռնած տանելու և ինձ փրկելու համար: Ամենակարող Բարձյալ, ես Քեզ եմ ապավինել ու Քո մեջ եմ ապաստան գտել, կյանքում Քո մատնանշած ուղիներն եմ ընտրել ինձ ուղեցույց: Խոնարհվում եմ Քո առջև, քանզի լսում էիր աղոթքներս, սրբում արցունքներս ու ճշմարտություն հուշում ինձ: Շնորհակալ եմ այդ ճշմարտության համար: Շնորհակալ եմ, որ արժանացա Քո փրկությանը: Շնորհակալ եմ իմ առջև բացած արդար ճանապարհների, խնդրածս ճշմարտությունն ինձ տալու, փնտրածս գտնել օգնելու, իմ բախած դուռը բացելու համար: Շնորհակալ եմ, քանզի լսեցիր աղաչանքս և ընդունեցիր խնդրանքս: Շնորհակալ եմ, որ պատեցիր ինձ Քո սքանչելի սիրով, հոգիս խինդով լցրիր և պարգևեցիր հավիտենական երջանկություն: Խոնարհվում եմ Քո առջև, քանզի սովորեցրիր ինձ Քո կամքը կատարել: Երախտապարտ եմ, քանզի օգնեցիր հաշտվել ճակատագրիս հետ: Այժմ անվերապահ վստահությամբ ու բացարձակ հավաստությամբ ցանկացած ընտրություն Քո բարի ու ճշմարիտ խոսքով եմ կատարում: Քո կամքը թող լինի:
Գոհություն Քեզ, գթասիրտ Հայր, քանզի մեր կողքին ես, ու մեր աղոթքի ձայնն հասնում է Քեզ: Դու տեսնում ես ամեն բան, Դու ամեն ինչ գիտես նախապես, Քեզ համար անկարելի բան չկա: Խոնարհվում ենք Քո առջև, քանզի կարող ենք խոսել Քեզ հետ, աղոթել, մեր մտքերը Քեզ հայտնել ու գիտենալ, որ սիրում ես մեզ ամենամաքուր ու սուրբ սիրով, համոզված լինել, որ երբեք մեզ մենակ չես թողնի: Քո զորությունն հովանի է մեզ:
Անսասան հավատի ողջ էությամբ գոհաբանում ենք Քո օրհնության ուժը, Քո զորությունը և մեծ փառքը: Լսիր Քեզ սրբաբանողների անհուն երախտագիտության ջերմագին աղոթքը, երկնի բովանդակ խորության անեզր ու անհատնում սիրով հավիտենապես երախտապարտ ենք Քո գթառատության և ողորմածության համար: Սիրում ու պաշտում ենք Քեզ մեր ամբողջ հոգով և մեր ողջ էությամբ:
Հավիտյանս գովյալ և փառավորյալ է Քո անունը: Մեծ է քո իմաստությունը, Դու արդար ես, Քո բոլոր գործերը ճշմարիտ են, ճանապարհներն ուղիղ են ու լուսավոր: Երկնքի ու երկրի Արարիչ, Քո արքայությունն հավիտյան է: Փառք ու զորություն Քեզ հավիտյանս հավիտենից: Ամեն:

«Բայց արդ, մնում են հավատ, հույս, սեր. սրանք` երեքը, և սրանցից մեծագույնը սերն է»: - Ա Կորնթ. 13:13

ԳՐԱՌՄԱՆ ՀԱՄԱՐ ՀԻՄՔ ԵՆ ԾԱՌԱՅԵԼ ԱՍՏՎԱԾԱՇՆՉՅԱՆ ԽՈՍՔԵՐ:

Ու կատարվեց...

Եթե ամենանվիրական մտքերս բարձրաձայն հնչելու կամ թե օդում արտատպվելու զարմանահրաշ կարողություն ունենային, ապա մարդիկ ամեն քայլափոխի կլսեին ու կտեսնեին «երջանկություն» բառը:
- Ի՞նչ նվեր ես ուզում բախտից,- հարցրին ինձ 22 տարեկան դառնալուս օրը:
Ես մի պահ շփոթվեցի, ապա խորհրդավոր ժպիտով ճակատագրական երազանք պահեցի ու ասացի.
- Ուզում եմ կյանքս երկու մասի բաժանել. մինչև 22 տարեկանն ու 22 տարեկանից հետո...
Եթե հոգիս խոսել կարողանար, ապա համայն մարդկությունն իր խոսելու ունակությունը կկորցներ: Եթե հոգիս պատմել կարողանար այն հրաշքները, որ կատարվեցին ինձ հետ, եթե միտքս արտահայտել կարողանար այն զորությունը, որ վերածնունդս ավետեց, եթե գրիչս կարողանար հաստափոր բառարաններում ամփոփված երախտագիտության ու փառաբանության սքանչելի խոսքերով գոհության ձոն նվիրել Բարձյալին, միևնույն է, ինձ շնորհված երջանկության ու լույսի անընդգրկելի բովանդակությունը լիարժեք տեսանելի, պատմելի ու բացատրելի չէր դառնա...
Իմ ցանկությունն իրականացավ: Իմ շուրթերից միամտաբար հնչածն աստվածային հրաշագործ զորությամբ վերափոխեց կյանքս: Ու երջանկությունը ներխուժեց իմ կյանք, սրբեց անցյալից մնացած ամեն թախիծ ու տխրություն, եդեմ արարեց իմ սրտում ու հավիտենական գարուն հռչակեց: Ու ես վերջապես հասկացա, որ իմ երջանկությունը հենց հիմա է, հենց այստեղ, ամենաներսում... Ես հասկացա, որ երազանքներս հասցե չունեն, անուն չունեն, անժամկետ են: Ես գտա ինքս ինձ, որ էլ երբեք չկորցնեմ: Ու ժպտացի: Լցված անհուն հավատի լիահույս շողերով` աչքերս երկինք բարձրացրի ու ջերմագին շշնջացի.

- Ամենակարող Տեր, ես երջանիկ եմ: Քո պարգևած երջանկությունը կատարյալ է, մաքուր ու սուրբ: Շնորհակալ եմ:
Եթե ամենանվիրական աղոթքներս բարձրաձայն հնչելու կամ թե օդում արտատպվելու կարողություն ունենային, ապա մարդիկ ամեն քայլափոխի կլսեին, կտեսնեին ու կհասկանային «երջանկություն» բառս: 

Ազատություն

Ես անցա հուսահատության փողոցով, ետևում թողեցի քամահրանքի պողոտան, մտա գորովանքի գետնանցում ու թեքվեցի դեպի ազատության կամուրջ: Հաստատուն քայլերով առաջ սլացող, բայց անհաշիվ դառնություններ տեսած, մշտատև ընթացքից ծանրացած ու թուլացած` ես ի վերջո հասա բաղձանքիս գագաթնակետին ու հաղթական դրոշը ծածանեցի:

Ես փարվեցի անկախության հուշարձանին, թարմ վարդերի բույրը տարածեցի շուրջբոլորն ու վառման հանդես բացեցի: Լռեցի շատ երկար, համրացած ու ոգևորությունից գլուխս կորցրած` մի պահ անշարժ աղոթք ասացի, հոգուս գաղտնարանից հիշողությունների մի բյուր ամբար բաժանեցի համայն աստղերին ու վերածնված, նոր ոգի առած ելա, դեմքս ուղղեցի դեպի լազուր երկինք ու... ժպտացի...

Ու եղավ այնպես, որ այլևս անկանգառ ընթացա բոլոր բարձրահարկ շենքերի, կողպված բնակարանների ու փակ դռների միջով, գրկեցի թանկ ու հարազատ մարդկանց ու անարգել սավառնեցի սպիտակ ամպերի վարդագույն խորքերում... Ու միշտ բարին եղավ, միշտ լավը, միշտ լուսավորը...

Ես անցա տխրության դպրոցն ու երջանկության դափնեպսակ ստացա: Ես հաղթեցի անորոշության դատապարտված ու անտերության մատնված ինքնամարտում, արտասուքի մի կաթիլ սահեց այտս ի վար, ես զարթնեցի ձմռան քնից, ես գարուն սփռեցի երկրիս ողջ մակերեսով մեկ, իմ ամբողջ ձայնով բացականչեցի սրտիս անբարբառ կանչերն ու խաղաղության դուռը գտա...
Ու եղավ այնպես, որ ազատությամբ շնորհվեցի: Ինքնակամ հասա համարձակության սահմաններից անդին ու ազատագրության փարոս ստեղծեցի, ծնկի եկա ու թոթափեցի տխրության ստվերն ինձնից: Ու այդժամ ես իմ հաջողության հուշարձանը կառուցեցի, ու թող մարդկությունն էլ իմանա, որ ինձ նմաններն առկայծում են արևի շողերից էլ վառ, չեն խամրում երբեք, չեն կորչում...

Ես անցա հուսալքության փողոցով, ետևում թողեցի պարտության պողոտան, մտա բերկրության գետնանցում ու թեքվեցի դեպի փրկության կամուրջ: Ու այդժամ եղավ այսպես...